Fundación Arume

Arredor de 40 profesionais do sector forestal e do ámbito científico xuntáronse durante dous días en Mondariz nun encontro que partía cun reto ambicioso, o de deseñar a folla de ruta para o piñeiro do país (‘Pinus pinaster’) nas próximas décadas.

Logo de anos de regresión en monte, por factores como os lumes, a expansión do eucalipto ou a ameaza da praga do nematodo, o piñeiro do país está a invertir esa tendencia, volvendo a gañar protagonismo.

A meteórica suba de prezo que experimentou a madeira de piñeiro no 2021 – 2022, unida á moratoria do eucalipto e ós avances na mellora xenética da planta de ‘Pinus pinaster’ son algúns dos motivos que explican ese cambio de tendencia. Pero como continuar a recuperación dos montes de piñeiro do país?.

A Asociación Forestal de Galicia quixo dar respostas a esta cuestión nun encontro transnacional Galicia – Norte de Portugal no que confluíron o ámbito científico e a xestión operativa en monte, con participación de centros de investigación, universidades, empresas de servizos forestais e industria da madeira. O encontro contou co patrocinio da Fundación Arume, da Consellería do Medio Rural e de Abanca.

O escenario de mercado a curto e medio prazo é positivo para o piñeiro, pois a demanda de madeira de coníferas vai ser moi superior á oferta, como xa se viviu no 2021 e 2022, pero hai que ter en conta tamén riscos para os montes de piñeiro, como o cambio climático, pragas e enfermidades ou lumes.

O desafío futuro é a produción de madeira en cantidade e calidade suficiente, un aspecto, o da calidade, para o que son fundamentais a mellora xenética e a silvicultura.

• Consulta e descarga todas as presentacións

OS RECURSOS DA MELLORA XENÉTICA

Os avances en mellora xenética de Pinus pinaster

PRESENTACIÓNS SOBRE DIFERENTES TEMAS:

Capacidade de produción de planta mellorada e demanda

Situación actual e evolución do recurso en Galicia e Portugal

Produción e demanda actual e futura de madeira de piñeiro no mercado

Esixencias tecnolóxicas da madeira e compatibilidade con aproveitamentos resineiros

Defectos en plantacións. Curvatura basal 

Rexeneración natural e incorporación de material mellorado

PREVENCIÓN E XESTIÓN DE RISCOS

A incidencia e evolución do nematodo

Outras patoloxías e danos bióticos en piñeirais

PRESENTACIÓNS DE DIFERENTES TEMAS: 

A silvicultura na zona de afección do nematodo

Compatibilidade con gando e fauna salvaxe

Problemas actuais e futuros ante riscos climáticos

SOSTIBILIDADE E SERVIZOS ECOSISTÉMICOS

Normativas europeas relacionadas coa xestión forestal sostible

O manexo da auga e o tratamento dos mananciais

PRESENTACIÓNS E DEBATES SOBRE DIVERSAS TEMÁTICAS:

Calidade do solo (conservación e fertilidade)

Capacidade de captación de CO2 en piñeirais

Indicadores ambientais en piñeirais e biodiversidade

Odón López (DXPOF).

Os piñeirais en espazos dunares, conservación e uso social

Viabilidade de diferentes modelos silvícolas

Incentivos actuais e novas propostas de axudas

Visitas a parcelas de ensaio e monte demostrativo

Como parte deste encontro, fixéronse diversas visitas a montes de piñeiro no sur de Pontevedra. Un dos percorridos foi nunha parcela de ensaios de ‘Pinus pinaster’ ubicada no monte veciñal de Soutelo (Salceda de Caselas), instalada no 2021 de xeito conxunto polo Centro de Investigación Forestal de Lourizán e a Asociación Forestal de Galicia.

Trátase dunha parcela na que se están ensaiando un total de 12 xenotipos resistentes ó nematodo do piñeiro e na que se están facendo comparacións entre a planta mellorada en Galicia, a identificada (sen mellora), e a mellorada en Portugal e en Francia. É unha parcela instalada hai dous anos, polo que aínda non hai unhas primeiras conclusións, se ben o comportamento da planta galega mellorada e da portuguesa está a destacar.

Outra das visitas técnicas foi ó monte demostrativo de Mouriscados (Mondariz), impulsado pola Asociación Forestal de Galicia en colaboración coa comunidade de montes veciñais de Mouriscados (Mondariz). No monte demostrativo de Mouriscados visitáronse traballos de plantación con planta mellorada, procedente de multiplicación vexetativa por estaquilla, así como unha plantación experimental de 2,7 hectáreas de planta resistente ó nematodo do piñeiro.

O percorrido polo monte veciñal de Mouriscados concluíu nunha zona na que, tras un recente incendio, restauráronse antigos bancais. É un traballo que se fixo con material controlado de ‘Pinus pinaster’, acompañado de rexeneración natural, e de franxas de bidueiros en determinadas zonas.