Fundación Arume

A Fundación Arume asume a dirección técnica da nova campaña de tratamentos contra a banda marrón e a banda vermella. Esta iniciativa, realizada en colaboración coa Dirección Xeral de Planificación e Ordenación Forestal, ten como prioridade mitigar os efectos destas doenzas que comprometen seriamente a saúde e a rendibilidade das masas de piñeiro, especialmente as de Pinus radiata, na comunidade.

A dirección técnica desta campaña consolida o compromiso da Fundación Arume coa sanidade dos piñeirais galegos, tras anos de traballo en vixilancia, asesoramento e coordinación contra as ameazas fitosanitarias. A colaboración coa Dirección Xeral de Planificación e Ordenación Forestal permite sumar esforzos e garantir unha resposta máis eficaz e coherente no territorio. A experiencia acumulada pola Fundación en campañas anteriores e na transferencia de coñecemento ao sector sitúaa como un actor clave na protección do patrimonio forestal galego.

Unha ameaza directa para o patrimonio forestal

A incidencia da banda marrón e da banda vermella transcende o ámbito sanitario: supón un risco real de desvalorización do monte para o propietario, ao afectar a calidade da madeira e reducir o seu valor comercial. A intervención liderada por Fundación Arume responde á necesidade dunha actuación coordinada e profesional, aplicando un enfoque preventivo e correctivo nas áreas onde a problemática é máis aguda.

Detalles e operativa da campaña

Os tratamentos darán comezo a finais de abril e prolongaranse ata o remate do verán ou principios do outono, dependendo sempre das condicións meteorolóxicas para garantir a máxima eficacia. A estratexia baséase na aplicación de produtos fitosanitarios, adaptándose ao ciclo biolóxico dos fungos causantes.

A selección das zonas prioritarias seguiu criterios técnicos rigorosos, poñendo o foco en:

• O nivel de afectación actual das masas.
• A densidade de masas de Pinus radiata, especie especialmente vulnerable.
• A continuidade das superficies para optimizar o impacto dos tratamentos.

Chamamento á participación dos propietarios

Para que a campaña sexa efectiva, a Fundación Arume convida a todos os propietarios forestais interesados en tratar as súas parcelas a que realicen o rexistro previo. A colaboración cidadá é esencial para acadar o obxectivo de tratar o máximo número de hectáreas afectadas.

Os propietarios deberán formalizar a súa solicitude mediante unha Declaración Responsable. Para obter este modelo oficial, poden contactar coa Fundación a través do correo:

arume@fundacionarume.gal
E o teléfono: 648662296

Para axilizar o proceso, os interesados deberán facilitar os seguintes datos básicos:

• Datos do titular e teléfono de contacto.
• Referencias catastrais das parcelas a tratar.
• Información da masa: especie dominante, idade aproximada e superficie real obxecto do tratamento (especialmente se a parcela non está ocupada integramente por piñeiro).

A Fundación recomenda aos propietarios que non demoren a súa solicitude, xa que a planificación dos tratamentos require organizar as actuacións por áreas e priorizar aquelas zonas onde a afección é máis urxente. Canto antes se formalice o rexistro, maior será a capacidade de resposta sobre o terreo.


- 

Sobre a Fundación Arume

A Fundación Arume, entidade declarada de interese para o desenvolvemento forestal de Galicia, está integrada polo conxunto da cadea forestal – madeira da comunidade: asociacións de propietarios forestais, empresas de servizos e enxeñaría, viveiros, serradoiros, fabricantes de taboleiro, Universidade de Vigo e Abanca. A Fundación traballa a prol do desenvolvemento do territorio, da súa multifuncionalidade, resilencia e biodiversidade.